&P469099 = RIMB 2.06.32.04 composite #atf: lang akk @object composite text @surface a 1. {disz}an-szar2-du3-ibila _lugal gal lugal_ dan-nu _lugal szar2 lugal kur_ asz-szur 2. _lugal_ kib-rat _limmu2_-ti _lugal-lugal-mesz nun_ la sza2-na-an 3. sza ul-tu tam-tim e-lit a-di tam-tim szap-lit i-be-lu-ma 4. gi-mir ma-li-ki u2-szak-nisz sze-pu-usz-szu2 5. _dumu_ {disz}an-szar2-szesz-szum2-na _lugal gal lugal_ dan-nu _lugal szar2 lugal kur_ asz-szur 6. _szagina_ babila2{ki} _lugal kur eme-gi7_ u3 uri{ki} 7. _dumu dumu_ {disz}{d}sin-pap-mesz-su _lugal_ dan-nu _lugal szar2 lugal kur_ asz-szur a-na-ku-ma 8. szi-pir e2-sag-il2 sza2 _ad_ ba-nu-u-a la u2-qa-at-tu-u 9. a-na-ku u2-szak-lil sat-tuk-ki e2-sag-il2 u _dingir-mesz_ babilax(|DIN.TIR|){ki} 10. u2-ki-in ki-din-nu-tu babila2{ki} ak-s,ur 11. asz2-szu2 dan-nu a-na _sig_ la ha-ba-li {disz}{d}gesz-nu11-mu-gi-na 12. _szesz_ ta-li-me a-na _lugal_-u-ti babila2{ki} ap-qid 13. ina u4-me-szu2-ma e2-tur3-kalam-ma _e2 {d}inanna_ babilax(|DIN.TIR|){ki} 14. esz-szisz u2-sze-pisz {d}inanna babilax(|DIN.TIR|){ki} {d}gaszan s,ir-tu 15. ep-sze-te-ia _munus saga-mesz_ ha-disz lip-pal-lis-ma 16. u4-me-szam-ma ma-har {d}en {d}gaszan-ia2 lit-tas-qar da-mi3-iq-ti 17. _ti_ u4-me _su3-mesz_ li-szim szi-ma-ti 18. it-ti _an_-e u3 _ki_-tim lu-ki-in _bala_-u2-a 19. u3 sza2 {disz}{d}gesz-nu11-mu-gi-na _lugal_ babila2{ki} 20. _szesz_ ta-li-mi-a u4-me-szu li-ri-ku lisz-bi lit-tu-tu 21. sza szu-mi szat,-ru u _mu_ ta-lim-ia ina szi-pir ni-kil-ti i-pa-asz2-szi-t,u 22. _mu-sar_-u-a i-ab-ba-tu lu-u a-szar-szu2 u2-nak-ka-ru 23. {d}inanna babilax(|DIN.TIR|){ki} ina ma-har {d}en {d}gaszan-ia2 _munus-hul_-szu2 24. lit-tas-qar _mu_-szu2 _numun_-szu2 ina _kur-kur_ li-hal-liq