Collapse
Transliteration
tablet obverse 1. a-na ia-as2-ma-ah-{d}iszkur 2. qi2-bi2-ma 3. um-ma {d}utu-szi-{d}iszkur a-bu-ka-a-ma 4. at-tu-nu a-na da-a-ak na-ak-ri-im 5. szi-ib-qi3 te-esz3-te-ne2-e u3 te-te-ne2-eg-gi-ra-szu 6. u3 na-ak-rum qa-tam-ma a-na ku-nu-szi-im 7. szi-ib-qi3 isz-te-ni-i u3 i-te-ne2!-gi-ir-ku-nu-ti 8. ki-ma {lu2}mu-usz-ta-ab-s,i2 9. a-hu-um a-na a-hi-im szi-ib-qi3 isz7-te-ne2-i 10. as-su2-ur-ri ki-ma te-el-tim ul-li-tim 11. sza um-ma-a-mi ka-al-ba-tum 12. i-na szu-te-bu-ri-sza hu-ub-bu-t,u3-tim 13. u2-li-id 14. at-tu-nu i-na-an-na ki-a-am la te-ep-pe2-sza 15. as#-[su2]-ur#-ri# na-ak-rum i-na szu-ba-a-tim 16. la# [i-te-ne2]-eg#-gi-ir-ku-nu-ti 17. [...] x-x-ku-nu 18. [...]-ni# 19. [...] 20. [sza-ni-tam a-na u2]-ru#-ba-a-at 21. a-li-ia# [la ta]-ta#-na-asz-asz-sa-nim#? 22. ma-ga-al la ta-at#-ta-na-al-ka# reverse 1. e-le-e a-sza-ri-isz qe2-ru-ub a-di e-li-ia sza [na]-s,a#-[ar] s,a#-bi-im ep-sza 2. asz-szum t,e4-mi-im sza u2-s,ur-pi-lugal 3. u2-wa-e-ra-ak-kum# 4. na-ak-rum sza it-ti li-da-a-ia 5. a-na pa-an isz-me-{d}da-gan usz2-bu 6. tu-uk-ki um-ma-na-a-tim 7. sza a-na s,e-er isz-me-{d}da-gan ip-hu-ra 8. isz-me-ma a-al-szu id-di-i-ma 9. it-be2-e-ma it-ta-la-ak 10. {disz}isz#-[me]-{d}da-gan a-al-szu 11. bu-ru-ul-la-[am]{ki} is,-s,a-ba-at 12. ma-a-at! u2-te-em ka#-la-sza ut,-t,e4-eh u2-ta-asz2-ki-in 13. a-na pi2-i-im isz-te-en usz-te-[szi]-ib-szi 14. s,a-bu-um a-na li-ib-bi ma-a-tim ip-ta-at,-ra-am 15. _u4 2(disz)-kam# [3(disz)-kam]_ i-na _e2-hi-a_-szu-nu 16. i-nu-uh-hu-ma i-pa-ah-hu-ru-nim 17. pa-an s,a-bi-im ka-li-szu a-s,a-ab-ba-tam-ma 18. i-na li-ib-bi _iti#_ an-ni-i-im 19. qa-du-um um-[ma]-na#-a-tim 20. a-na re-esz _a-sza3_-ia a-sza-ri-isz 21. a-ka-asz-sza-dam an-ni-tam lu-u2 ti-de-e 22. a-di e-li-ia sza na-s,a-ar s,a-bi-im-ma 23. e-pu#-usz2 left 1. _iti_ a-bi-im _u4 8(disz)-kam ba-zal_-ma 2. t,up-pi2 an-ne2-e-em isz-tu szu-ba-at-{d}en-lil2{ki} 3. u2-sza-bi-la-ak-kum